有日一位先生嚟到診所。
佢行埋嚟登記處同我講：「我下面有啲事呀，有冇得即刻睇呀？」
我：「可以呀，你俾身分證我呀，我同你登記先」
佢：「醫生有冇經驗㗎」
我：「你睇啲咩呀？」
佢：「我應該點講俾你知呀？」
都係唔好講啦。
我：「咁入到醫生房再同醫生講呀，醫生應該幫到你嘅」
佢：「我下面俾我朋友篤穿咗，係咁流血，我自己止唔到血呀」
你哋玩咩嚟呀？
我：「…咁你快啲俾身分證我啦」
佢：「定係我咁嘅情況應該要去急症室呀？我下面會唔會因為止唔到血而爛呀？」
流晒啲血出嚟最多都係收皮啫，應該就唔會爛嘅。
我：「一係你俾醫生睇睇先啦，真係有需要嘅就直接去急症室啦，你流咗好多血咩？」
佢拎咗張紙巾出嚟…一筒嚟咋喎，又有幾多血呀？我以為你係成張紙巾咁多呀…
我：「可以同你登記睇醫生先呀」
呢個時候，另一位先生B入咗嚟診所，離遠講：「我真係對你唔住呀，我唔知會搞到咁㗎」
先生A：「姑娘話我要去醫院呀好大件事呀」
我冇咁講過。
先生B行埋嚟碌大對眼問我：「真係咁大件事呀？我冇諗過會咁㗎，而家我哋係咪等去醫院呀？CALL咗車啦？」
我：「我係話登記咗先，俾醫生睇咗咩情況先…」
先生A同先生B：「醫生都要我去醫院呀，你負責我下半生啦」
定下半身？
先生B：「我挑咗幾下咋喎」
定屌？
唉，我好亂。
我：「你哋兩位冷靜少少先…睇咗醫生先啦，唔睇醫生嘅話唔知咩事㗎嘛」
先生B：「我用暗瘡針同佢挑粒瘡咋嘛」
先生A：「你挑還挑，你挑正佢啦」
先生B：「我要挑粒瘡呀嘛，唔挑佢唔通挑隔離塊皮呀？我挑你之前有問你係咪挑㗎喎，你話挑得㗎！」
你哋唔好再挑嚟挑去啦，我聽到有啲畫面呀。
先生A：「姑娘你一係同我睇吓佢挑到我咁仲有冇得救呀？係咪要即刻去醫院呀？」
冇得救㗎啦，直接大爆炸啦。
先生A行遠幾步，舉起隻腳：「姑娘你睇吓啦」
挑你，雞眼咋話？睇醫生啦，煩。
Search